［茶走人涼］（冇打錯字）嘻。希望何傲兒唔好咁傷心。但真係古語有云 茶走人涼，股票就掉轉，最冷血，屍骨未寒就即炒。之前759林生又係咁，呢位林生亦係咁。
1. 之前Bossini 又賣盤先施又賣，我Patreon甚至連呢隻鱷魚恤都寫過！但當時當然冇講林生健康唔好（雖然人人都知，但亦唔會話等人死咁冷血）
2. 公司業務？算九數啦，你幾時買過鱷魚恤？雖然其實香港La Coste都係佢地代理。N年前有打過官司，後來講掂數，索性畀你賣賣，分錢啫。而鱷魚恤就變咗 左邊開口嘅金鱷魚，La Coste就右邊開綠色。驗眼咩！（仲驗埋色盲）
3. 但同好多老牌企業一樣，鱷魚恤最值錢係—物業。（同你屋企啲廢老一樣）。早早買咗寫字樓，租出去，好和味。最主要係觀塘鱷魚恤中心，另外仲有啲雜雜碎碎，不過中環果楝應該一早賣咗（而家農業銀行）（＊）
4. 咁咁多年都係估，私有化。林生年紀都大啦。有個女的，我唔熟，但你將心比己，真係仲想賣鱷魚恤咩。咁日日收租當然好過癮，但人就係咁奇怪，有錢就想要其他嘢。不如私有化又好賣盤又好玩其他嘢啦。咁林生過身，唔多唔少有人覺得會加速呢樣嘢。
5. 另外，呢啲嘢真係股票市場最快手。上次澳門何生過世又係咁，使鬼等你官方出通告咩。側聞以前啲狗仔隊直頭捕住在醫院，甚至買通啲工作人員，聽聞嗰時肥肥啲遺照都係咁流出嚟。
6. 我就話呢，應該搵個analyst 去醫院捕住，甚至自己日日去坐。講真，有錢人醫院，有幾多間丫。唔通林建名入屯門醫院咩。咪又係養和。咁你在餐廳長期打躉，聽聞啲嘢幾好食。收下料睇下邊個就死，應該OK，反正而家可以上網落盤上網寫文。
7. 不過話時話，呢啲機會都越嚟越少。都係……社會嘅轉變，時代嘅轉變，借來嘅地方，借來嘅時間。老牌香港家族企業，執嘅執，賣嘅賣，死嘅死。廿年間消失好多了。
8. 最後就希望林生安息，都唔係頭盔，平時你見我唔使咁虛偽加呢句。但林生一家真係帶比大家唔少歡樂。拍戲又係，佢地啲真人生活都係。例如林老太評王祖賢嗰句，我地講足三十年呀。講真，佢地做生意真係麻麻地，都未講麗新摸頂買FURAMA（嘩，時代的眼淚！，而家中環AIA），蝕到七彩。都係飲飲食食拍下戲好，岳少啲餐廳水準保證呀，埃汾以前買雪茄間嘢都好似佢開。
（＊）個故事都幾悲壯，係一早賣咗的。蔡志明2002同麗新買，你估下幾錢？4.5億咋。成楝中環黃金地段寫字樓呀！尺價係……三千幾蚊！之後嘅事不用多講了。而當時麗新應該係十分莫財嘅。低位被迫沽嘢，好慘痛的。當然知而行難，順境時永遠覺得買得唔夠多（係呀，講緊你），借盡佢，逆境時就出事。亦唔止係散仔係咁，幾時出事都係槓杆，新世界以前係咁，星島都係咁（胡仙敗晒祖業，虎豹別墅變咗名門（你以為李嘉誠善男信女？）。不過有時出事可以R政府打救，例如信和，例如美資銀行。
==============
你嘅2020年點？我嘅2020年就幾好。Ivan Patreon，港美市場評點，專題號外，每日一圖，好文推介。每星期6篇，月費100唔使，4個月已1000人訂！（https://bityl.co/4Y0h）。月頭訂至抵，年費仲有85折，仲係睇13個月添
Search